இந்தியாவின் கர்நாடக மாநிலம் ஹாசன் மாவட்டம் ஏ.குடுகனஹள்ளி பகுதியை சேர்ந்தவர் மனுகுமார் (வயது-25). இவர் அந்த பகுதியில் ஓட்டல் நடத்தி வருகிறார். இவர் அதே பகுதியை சேர்ந்த பவானி (25) என்ற இளம் பெண்ணை காதலித்து வந்தார்.
இருவரும் பியூ கல்லூரியில் படிக்கும் போது காதலித்து வந்துள்ளனர். இந்நிலையில் கடந்த சில மாதங்களாக மனுகுமார் பவானியிடம் சரியாக பேசுவதில்லை என கூறப்படுகிறது. மேலும், திருமண பேச்சு வார்த்தை நடந்தால், தற்போது அதுபற்றி பேச மறுத்து வருகிறார்.
அதுமட்டுமின்றி பவானி செல்போனில் அழைத்தபோதும் மனுகுமார் பதில் சொல்லாமல் தவிர்த்து வந்தார். இதனால் இருவருக்கும் இடையே தகராறு ஏற்பட்டது. இந்நிலையில், நேற்று முன்தினம் இரவு 12.30 மணியளவில், புத்தாண்டு கொண்டாட, மனுகுமாருக்கு அவரது நண்பர்கள் போன் செய்தனர். அப்போது, பவானி அங்கு வந்தார். பின்னர் இருவரும் தனித்தனி அறையில் அமர்ந்து காதல், திருமணம் குறித்து பேசினர். அப்போது மனுகுமார் திருமணத்துக்கு சம்மதிக்கவில்லை என தெரிகிறது.
இதனால் ஆத்திரமடைந்த பவானி, தான் மறைத்து வைத்திருந்த கத்தியால் மனுகுமாரை பலமுறை குத்தினார். இதில் பலத்த காயம் அடைந்த மனுகுமாரை அவரது நண்பர்கள் மீட்டு மருத்துவமனையில் சிகிச்சைக்காக சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இந்த சம்பவம் குறித்து படாவனே போலீசார் வழக்குப்பதிவு செய்து பவானியை கைது செய்தனர். அவரிடம் போலீசார் தொடர்ந்து விசாரணை நடத்தி வருகின்றனர்.
